بسم الله الرحمن الرحيم
قـصـيدة مثايل للـشـيخ ناصر بن حـمـد:
هات القلم بكتب قصيدي على شان أختار لي بين المثايل مثايل
دام القصيد يمثل شعور الانسان باحاول أعطي عن شعوري دلايل
و أنا حسب عرفي على مر الأزمان عندالنشاما ماتضيع الجمايل
و من يفعل المعروف ماهوب خسران دام النوايا بيض والشك زايل
والحكي في بعض المواقيف نقصان لاصارعقب الحكي ما من صمايل
إفعل وتلقى لك مع الناس عنوان وتلقى مكانك فالصفوف الأوايل
وانا وريث أهل العطايا والأحسان أهل المبادي و الكرم والفعايل
نعطي و يرجح بالعطا كل ميزان ونقدم الجزلات للأهل الجزايل
عاداتنا لاجات روغات الأذهان نلقى لنابين الوسايل وسايل
للخيل خياله و للحرب فرسان وللضد ضد وللسلايل سلايل
حنا هل الوقفات في كل ميدان أهل العزاوي متعبين الأصايل
ياماركبناها بلا سرج و عنان و ياما ردعنا فوقها كل عايل
وياماحذفنا الروس من فوق الأمتان وياما سترنا ناقضات الجدايل
حنا نفك رقاب ونحرر أوطان ونعدل الوقت الردي لاتمايل
هذا الكلام الصدق من قلب ولسان ما هو كلام أهل الحكي والتحايل
و إللي يبي للعلم أدله و برهان يرجع لتاريخ العرب والقبايل
يحق لي لاقلت أنا عالي الشان مادامني من صفوة عيال وايل
[ندعوك للتسجيل في المنتدى أو التعريف بنفسك لمعاينة هذا الرابط]
الجمعة أغسطس 19, 2011 1:36 am
